Nguri-uri Batik, Tanda Tresna Budaya

sumber: Perpustakaan Universitas Brawijaya
https://images.app.goo.gl/au1HtxjinKvJ2WEaA

Ing saben pojok Indonesia, mesthi ana warisan budaya sing wis dijaga saka jaman mbiyèn. Kuwi ora perlu diraguhi manèh, merga Indonesia iku negara sing sugih budaya. Salah sijiné yaiku Pulo Jawa, sing kebak peninggalan budaya, kalebu batik, yaiku karya seni sing ora mung nempel ing kain, nanging uga dadi bagian saka jiwa bangsa.

Batik iku salah siji bentuk saka kebhinekaan Indonesia, lan wis dikenal masyarakat saka jaman mbiyèn nganti saiki. Saben krungu tembung “batik”, umume wong bakal kelingan proses nggawe motifé. Proses iki kalebu nggambar pola nganti mewarnani kain nganggo teknik khusus supaya hasilé apik lan berkualitas. Motif batik dhéwé nduwèni makna, saka kepribadian masyarakat, pangarep-arep, nganti unsur saka alam.

Saiki, ana kurang luwih 5.849 motif batik sing sumebar saka Sabang nganti Merauke.

Batik tradisional asalé saka budaya daerah sing sugih kearifan lokal. Motif-motifé nyritakaké nilai-nilai urip, lan bisa diarani nganggo "bahasa batik". Yen ngomongaké batik tradisional, mesthi ora bisa uwal saka nilai-nilai budaya Jawa, Hindu, lan Islam, ditambah pengaruh saka bangsa liya sing tau teka menyang Nusantara.

Mbiyèn, mbatik kuwi tradisi turun-temurun. Saiki, batik wis dadi bagian saka urip saben dina masyarakat Indonesia. Malah, UNESCO wis netepaké batik dadi Warisan Budaya Tak Benda milik umat manungsa wiwit taun 2009.

Minangka warga Indonesia, kita kudu njaga lan nglestarèkaké batik. Salah sijiné cara yaiku nganggo batik ing kegiatan saben dina utawa acara penting. Pemerintah uga wis netepaké 2 Oktober dadi Hari Batik Nasional miturut Keputusan Presiden No. 33 Tahun 2009. Ing tanggal kuwi, saka kantor nganti sekolahan, kabeh warga Indonesia saka Sabang nganti Merauke padha diwajibaké nganggo batik.

Ngagem batik ing Hari Batik Nasional kuwi ora mung kanggo memperingati keindahané, nanging uga minangka wujud tresna lan komitmen kita kanggo terus njaga, nglindhungi, nglestarèkaké, lan ngenalaké batik marang anak-anak lan generasi sabanjuré. Batik uga dadi cara kanggo ngangkat jeneng Indonesia ing kancah internasional.

Biasané, ing Hari Batik Nasional bakal ana acara kaya festival batik, pameran batik, pelatihan mbatik, lan kegiatan seni liyané. Kabeh kuwi dadi upaya kanggo nglestarèkaké batik minangka salah siji budaya Indonesia sing istimewa.

---